अन्तत: अभिनेता पल शाह भए रिहा
काठमाडौँ । अन्तत: अभिनेता पूर्णविक्रम (पल) पल शाह रिहा भएका छन् । उच्च अदालत पोखराले हिजो सफाइ दिएपछि शाह आज सोमबार तनहुँ कारागारबाट आवश्यक प्रक्रिया पुरा गरेर रिहा भएका हुन् ।
हिजो आइतबार कार्यालय समय सकिएकोले आवश्यक प्रक्रिया पुर्याउन ढिला भएपछि आज कार्यालय खुलेसँगै सवै प्रकिया पुरा गरेर उनी रिहा भएका हुन् । अव रिहा भएपछि उनी आजै काठमाडौँ आउने बुझिएको छ ।
बालयौन दुराचारको मुद्दामा अभिनेता शाहलाई उच्च अदालत पोखराले हिजो सफाइ दिएको थियो । उच्च अदालतका न्यायाधीश डिल्लीराज आचार्य र श्रीधराकुमारी पुडासैनीको संयुक्त इजलासले हिजो नायक शाहलाई सफाइ दिएको थियो ।
नवलपुर अदालतले बालयौन दुराचारको मुद्दामा शाहलाई साढे दुई वर्ष कैदको फैसला सुनाएको थियो । शाहले उक्त फैसला विरुद्ध उच्च अदालत पोखरामा पुनरावेदन दिएका थिए । उच्च अदालतको हिजोको इजलासले उक्त मुद्दामा अभियोग दाबी नपुग्ने ठहर गरेको थियो ।
नाबालिगलाई जबरजस्ती करणीको अभियोगमा तनहुँ कारागारमा थुनामा रहेका नायक शाहलाई तनहुँ अदालतले भने सफाइ दिइसकेको थियो । नाबालिगमाथि जबरजस्ती करणी गरेको भन्दै शाह विरुद्ध गत फागुन ११ गते तनहुँ प्रहरीमा उजुरी परेको थियो ।
शाहले फागुन १५ गते प्रहरी कार्यालयमा आत्मसमर्पण गरेका थिए । शाहलाई चैत १० गते तनहुँ अदालतले पुर्पक्षका लागि थुनामा पठाउने आदेश दिएको थियो ।
यो पनि पढ्नुहोस्
उच्च अदालतबाट आज सफाइ पाएका पल भोलि रिहा हुने (पूर्णपाठ)
